Cundiziuns d'admissiun
Fin ussa regla il concordat davart la coordinaziun da la scola da l'onn 1970 (concordat da scola) da la conferenza svizra da las directuras e dals directurs chantunals da l'educaziun publica (CDEP) las cundiziuns generalas impurtantas per la scola primara e fixescha la vegliadetgna d'ir a scola sin il sisavel onn da vegliadetgna. Vers la fin da la scola preliminara vegn giuditgada l'abilitad d'ir a scola ed i vegn decidì, sch'in uffant po cumenzar la scola u sch'il cumenzament vegn suspendì per in onn. Al process da decisiun èn participadas las persunas d'instrucziun, ils geniturs/las persunas cun la pussanza dals geniturs ed eventualmain ils servetschs psicologics u medicinals da scola. La decisiun definitiva vegn prendida il pli savens da las autoritads da surveglianza da scola (cussegl da scola, inspecturat da scola).
Uffants cun basegn da furmaziun spezial
L'obligaziun d'ir a scola vala er per uffants che han in basegn da furmaziun spezial. Confurm al stadi da lur svilup pon quests uffants vegnir integrads en la scola regulara u frequentar instituziuns spezialas (cf. pedagogia curativa e speziala).
Experiments da scola
Differents chantuns fan experiments da scola pertutgant il stgalim inizial per chattar ina midada pli flexibla da la scola preliminara a la scola primara (stgalim da basa cf. scola obligatorica).
La cunvegna interchantunala davart l'armonisaziun da la scola obligatorica (concordat HarmoS) vegn a cumplettar il concordat da scola.
Ulteriuras infurmaziuns
