Cuntegns d'instrucziun

La scola preliminara promova il svilup socioaffectiv, psicomotoric e cognitiv dals uffants ed als prepara per l'entrada en scola. Quai vegn fatg senza in giudicament sistematic da las prestaziuns e senza selecziun (i na vegn fatga nagina classificaziun en gruppas da prestaziun). Ils uffants vegnan promovids tenor lur svilup e tenor lur basegns. Accentuads vegnan il svilup da l'independenza sco er las cumpetenzas persunalas, socialas e da la materia.

Plans d'instrucziun

Ils novs plans d'instrucziun per la scola preliminara han la medema basa e las medemas finamiras da furmaziun sco ils plans d'instrucziun dal stgalim primar. Els accentueschan dentant ina furmaziun cumplessiva, interdisciplinara ch'è orientada al svilup da l'uffant. L'instrucziun da las tecnicas culturalas (leger, scriver, far quints) è resalvada per gronda part als plans d'instrucziun dal stgalim primar. I vegnan però exercitadas abilitads precursuras che servan a l'acquisiziun da las tecnicas culturalas. Ils cuntegns da la furmaziun vegnan formulads en finamiras d'instrucziun da caracter liant. Tut tenor il plan d'instrucziun vegnan definidas finamiras per ils differents roms (p.ex. uman ed ambient, moviment, lingua, furmaziun, musica, matematica) u formuladas finamiras d'instrucziun interdisciplinaras (p.ex. sviluppar las pussaivladads da sa mover, differenziar la percepziun, dumagnar success e disditgas, realisar e tematisar eveniments da la natira, chapir ed applitgar las reglas da la lingua da mintgadi e.u.v.).

HarmoS

En connex cun la nova concepziun dal stgalim da scola inizial (stgalim da basa) ston ils cuntegns ch'eran attribuids fin ussa a la scola preliminara ed al stgalim primar, vegnir reunids ed elavurads permanentamain neuer Text: werden.... vermehrt . I na duai betg pli dar ina cesura tranter la scola preliminara e la scola primara, mabain ils uffants duain vegnir famigliarisads pass per pass cun la moda d'emprender en scola e cun la basa da las cumpetenzas socialas. In'emprima manifestaziun da la moda d'emprender en scola duai esser pussaivla, sch'il svilup da l'uffant è adattà, gia a partir dal cumenzament da la scola preliminara.

Plans d'instrucziun da las regiuns linguisticas

Ils plans d'instrucziun da las regiuns linguisticas, che vegnan sviluppads en il rom da l'armonisaziun da la scola obligatorica (HarmoS), cumpiglian er las finamiras d'instrucziun per la scola preliminara.

Per promover la cumpetenza linguistica han differents chantuns da la Svizra tudestga relaschà recumandaziuns per il diever da la lingua tudestga da standard en scola preliminara.