Cuntegns d'instrucziun
Las finamiras generalas da la scola primara èn da laschar sviluppar las scolaras ed ils scolars lur abilitads intellectualas e creativas sco er fisicas ed artisticas e d'als laschar emprender d'avair responsabladad per sasezs, per l'ambient, per lur conumans e per la societad sco er d'als laschar acquistar uschia las enconuschientschas e cumpetenzas fundamentalas per lur carriera da furmaziun persunala.
Roms
En il stgalim primar vegnan instruids ils suandants roms:
-
la lingua naziunala (tut tenor la regiun rumantsch, tudestg, franzos u talian), savens integrà en questa instrucziun: scriver
-
duas linguas estras (en realisaziun: cf. scola obligatorica)
-
matematica
-
istorgia
-
geografia
-
introducziun en la tematica da las scienzas natiralas
-
furmaziun creativa
-
lavurs da maun e zambregiar
-
musica
-
sport.
En intgins chantuns vegnan differents secturs spezials – sco l'introducziun en la tematica da las scienzas natiralas, geografia ed istorgia – instruids en il rom d'in sectur spezial (p.ex. "uman ed ambient"). Ulteriurs secturs sco l'applicaziun da las novas tecnologias d'infurmaziun e da communicaziun u la promoziun da la sanadad vegnan integrads en auters roms. La maioritad dals chantuns prevesa l'instrucziun da religiun resp. d'etica.
Ils chantuns determineschan ils uraris ed ils plans d'instrucziun e decidan davart ils meds d'instrucziun. En il rom da l'armonisaziun da la scola obligatorica (HarmoS) vegnan sviluppads ils plans d'instrucziun tenor las regiuns linguisticas: per ils chantuns da la Svizra franzosa il Plan d'études romand (PER), per ils chantuns da lingua tudestga e plurilings il plan d'instrucziun 21. Er la coordinaziun dals meds d'instrucziun duai vegnir fatga sin il plaun da las regiuns linguisticas.
Ulteriuras infurmaziuns
