Cuntegns d'instrucziun

Las differentas instituziuns da furmaziun supplementara mettan a disposiziun in grond dumber da studis e da direcziuns che han – tut tenor purschida e gruppas en mira – differentas finamiras, differents cuntegns e differenta durada. Ils temas da las occurrenzas da furmaziun supplementara èn tranter auter las linguas, las tecnologias d'infurmaziun, la sanadad e la medischina, ils curs da cader, l'art e la cultura, la furmaziun da la persunalitad, il sport, la famiglia e l'economia da chasa.

Furmaziun da cumpensaziun

La furmaziun da cumpensaziun permetta da repeter la furmaziun fundamentala (en il senn da las abilitads fundamentalas sco leger e scriver; sco er en paucs chantuns da far in diplom dal stgalim secundar I), ils diploms da furmaziun generala e professiunala (maturitad gimnasiala, certificat da scola media professiunala, diplom da furmaziun fundamentala professiunala, maturitad professiunala).

I dat er purschidas da furmaziun supplementara per tschertas gruppas en mira sco per persunas immigradas, per persunas dischoccupadas, per persunas attempadas, per geniturs e.u.v.

Sin il champ da la furmaziun supplementara orientada a la professiun e generala sco er en la cussegliaziun da carriera existan differentas bancas da datas che infurmeschan davart ina vasta purschida da furmaziuns supplementaras (tranter auter berufsberatung.ch; purschidas da furmaziun supplementara [PFS]).