Datas statisticas

La maioritad da la populaziun en Svizra frequenta furmaziuns supplementaras en ina moda u l'autra: 77% da la populaziun residenta resp. 83% da las persunas cun activitad da gudogn èn sa participadas ils onns 2005/2006 ad almain ina activitad da furmaziun supplementara. I po sa tractar d'activitads da furmaziun supplementara che han lieu en in rom organisà (frequentar curs, seminaris, instrucziun privata che na maina dentant a nagin diplom renconuschì) u en furmas d'emprender informalas (diever da furmas d'emprender individualas sco lectura da litteratura spezialisada, emprender da collegas da lavur; emprender da CD-ROM u da l'internet).

Furmaziun supplementara

L'emprender en moda informala è preponderant visavi la furmaziun supplementara che ha lieu en in rom organisà: 71% da la populaziun residenta e 77% da las persunas cun activitad da gudogn han gì ina furmaziun supplementara cun agid da litteratura spezialisada u cun emprender da collegas da lavur e.u.v. 43% da la populaziun residenta e 53% da las persunas cun activitad da gudogn han gì ina furmaziun supplementara cun frequentar curs, seminaris, dietas e.u.v.

Persunas cun in'activitad da gudogn a temp cumplain han absolvì pli savens ina furmaziun supplementara che persunas cun in'activitad da gudogn a temp parzial (pensums da lavur sut 50%).

51% da las persunas cun activitad da gudogn e 22% da las persunas senza activitad da gudogn han frequentà curs, seminaris u autras occurrenzas da furmaziun supplementara. Pli aut ch'il nivel da furmaziun è e pli pitschna che l'activitad da furmaziun supplementara è. 95% da las persunas cun activitad da gudogn che possedan in diplom dal stgalim terziar ed 82% da quellas che possedan in diplom da stgalim secundar II han fatg ina furmaziun supplementara d'ina moda u l'autra. Tar persunas senza scolaziun postobligatorica è la quota 59%.

Sustegn dal las patrunas ed ils patruns

Las patrunas ed ils patruns promovan ina furmaziun supplementara orientada a la professiun da las persunas cun activitad da gudogn: saja quai ch'els organiseschan sezs la furmaziun supplementara, ch'els permettan d'organisar la furmaziun supplementara totalmain u parzialmain durant il temp da lavur u ch'els surpiglian ina part dals custs. L'onn 2006 èn trais quarts da las uras da furmaziun supplementara che han lieu en in rom organisà vegnidas sustegnidas da la patruna u dal patrun. Ina gronda part dal sustegn è vegnì dà tant areguard las finanzas sco er areguard la lavur. Var set da diesch uras da furmaziun supplementara èn vegnidas finanziadas totalmain u parzialmain da la patruna u dal patrun. Las grondas interpresas promovan la furmaziun supplementara da lur collavuraturas e da lur collavuraturs pli fitg ch'ils manaschis pitschens.

Diploms

L'onn 2007 èn vegnids surdads 1197 diploms da furmaziun supplementara universitara (dimensiun almain 60 puncts dad ECTS). 30% dals diploms da furmaziun supplementara èn vegnids surdads a dunnas, 38% ad absolventas ed ad absolvents esters. La gronda part dals diploms èn vegnids absolvids en las scienzas economicas, tecnicas sco er umanas e socialas. L'onn 2007 èn vegnids surdads 2422 diploms da furmaziun supplementara professiunala (dimensiun almain 60 puncts dad ECTS). 25% dals diploms èn vegnids surdads a dunnas, 13% a studentas ed ad students esters. Il sectur spezial "economia e servetschs" ha dominà la furmaziun supplementara.

Cifras uffizi federal da statistica (UST)