Organisaziun

La structura dals curs e dals studis, il temp che vegn duvrà, las furmas per cumprovar las prestaziuns e.u.v. èn fitg differents e dependan da la furmaziun supplementara tschernida. Dapi mez dals onns 90 è sa confermada – en il sistem svizzer da furmaziun supplementara – la scolaziun modulara en blers secturs. Ils moduls èn unitads isoladas che pon vegnir frequentadas independentamain ina da l'autra u che pon vegnir resumadas ensemen cun auters moduls a studis. Il sistem modular è in sistem avert e permeabel.

Diplom/certificats

Las occurrenzas da furmaziun supplementara mainan per gronda part ad in certificat final. Las participantas ed ils participants survegnan per regla ina conferma dal curs.

En la furmaziun da cumpensaziun sin il stgalim secundar II po vegnir fatg l'attestat da maturitad gimnasiala, il certificat da scola media professiunala, l'attestat federal da qualificaziun e l'attestat federal da maturitad professiunala.

Sin il stgalim terziar pon vegnir fatgs diploms u certificats privats u renconuschids. Pli e pli vegnan applitgads er portfolios (p.ex. portfolio europeic da linguas).

Sin il champ da la furmaziun supplementara da las scolas autas datti tranter auter ils suandants diploms:

I pon vegnir fatgs diploms u certificats ch'èn renconuschids sin plaun internaziunal (tranter auter per l'acquisiziun da linguas estras).

Validaziun da prestaziuns da furmaziun

Las experientschas professiunalas u extraprofessiunalas sco er la furmaziun speziala u generala duai – tenor la nova lescha federala davart la furmaziun professiunala (LFPr) – vegnir messa a quint tras las procedeuras usitadas sco er tras autras proceduras da qualificaziun. Uschia duai vegnir pussibilità l'access a diploms federals, senza ch'i stoppia vegnir fatg in studi ordinari. En il project "validaziun da prestaziuns da furmaziun" vegn elavurà in mussavia naziunal per renconuscher e per validar las cumpetenzas ch'èn vegnidas acquistadas persunalmain ed en la professiun.