Pretensiuns

A la scola primara vegnan giuditgadas las prestaziuns cun agid da notas, da scalas da valitaziun u da rapports davart l'emprender. Rapports davart l'emprender e discurs da qualificaziun vegnan applitgads cunzunt durant ils emprims onns dal stgalim primar. En la maioritad dals cas vegni cumenzà a dar attestats da notas tranter l'emprim ed il quart onn da scola. La scala da las notas tanscha per regla dad 1 fin 6 (6 = meglra nota; 4 = suffizient; sut 4 = insuffizient). Per regla survegnan las scolaras ed ils scolars duas giadas per onn, a la fin d'in semester, in attestat da notas resp. in rapport davart l'emprender.

En differents projects che pertutgan il giudicament da las scolaras e dals scolars vegnan experimentadas furmas da giudicament cumplessivas cun elements furmativs e diagnostics. En differents chantuns vegnan organisads – tscherts onns da scola e per tscherts roms – examens finals annuals ch'èn facultativs u obligatorics, lavurs d'orientaziun e da cumparegliaziun u mesiraziuns dal stadi da prestaziun d'ina classa. Quests tests pon vegnir utilisads sco analisa da la situaziun u sco giudicament da la prestaziun da la scolara u dal scolar e permettan a la persuna d'instrucziun da valitar il success da la classa en cumparegliaziun cun il success d'autras classas. En differents chantuns vegnan fatgs sforzs per coordinar la mesiraziun da la prestaziun.

Per scolaras e per scolars ch'èn spezialmain talentads datti la pussaivladad da vegnir tramess a scola pli baud u da sursiglir ina classa. Ultra da quai èsi er pussaivel d'als promover supplementarmain en moda individuala en lur classa regulara. Purschidas d'ina promoziun speziala ordaifer la classa regulara èn main frequentas, anc pli raras èn classas u scolas spezialas per uffants ch'èn spezialmain talentads.

Promoziun en la proxima classa

En la scola primara vegni decidì a la fin da mintga onn da scola, sche las scolaras e sch'ils scolars pon vegnir promovids en la proxima classa sin fundament da lur prestaziuns. La promoziun provisorica u definitiva en la proxima classa vegn fatga sin fundament da la media da las notas che l'uffant ha obtegnì (en tut ils roms u en ils roms centrals). La repetiziun d'ina classa è previsa en las leschas chantunalas da scola, vegn dentant applitgada differentamain. Al stgalim primar han repetì l'onn da scola 2007/2008 1.7% da las scolaras e dals scolars ina classa. En cas da basegn pon er vegnir assegnadas mesiras da promoziun da pedagogia speziala a scolaras ed a scolars.