Pretensiuns

Durant l'onn da scola fan las persunas d'instrucziun adina puspè tests en ils roms respectivs. Per regla vegn utilisada ina scala da las notas che tanscha dad 1 fin 6 (6 = meglra nota; 4 = suffizient; sut 4 = insuffizient). La gronda part dals chantuns consegna duas giadas l'onn ils attestats. Ultra da l'attestat vegn fatg per regla in discurs da qualificaziun cun las scolaras e cun ils scolars sco er cun ils geniturs/las persunas cun la pussanza dals geniturs. Il cumportament social, d'emprender e da lavurar po er far part dal giudicament. Rapports en scrit davart l'emprender vegnan utilisads da rar. En differents chantuns vegnan organisads tscherts onns da scola ed en tscherts roms examens finals annuals ch'èn facultativs u obligatorics, lavurs d'orientaziun e da cumparegliaziun u mesiraziuns dal stadi da prestaziun d'ina classa. Quests tests pon vegnir utilisads per analisar la situaziun u per giuditgar la prestaziun da la scolara u dal scolar e permettan a la persuna d'instrucziun da valitar il success da la classa en cumparegliaziun cun il success d'autras classas. Projects ch'èn en curs fan in'analisa da la situaziun a la fin dal 8avel onn da scola, per promover las scolaras ed ils scolars cun cleras finamiras durant ils 9avel onn da scola. Durant il 9avel onn da scola pon ils giuvenils empruvar da scriver lavurs finalas u da manar portfolios cun in profil persunal da lur prestaziuns. En differents chantuns vegnan fatgas stentas per coordinar la mesiraziun da la prestaziun.

Per scolaras e per scolars ch'èn spezialmain talentads datti la pussaivladad da sursiglir ina classa. En la classa regulara vegnan er messas a disposiziun purschidas da promoziun. Al stgalim secundar I datti paucas classas u scolas spezialas per uffants ch'èn spezialmain talentads.

Promoziun en la proxima classa

La promoziun en la proxima classa vegn fatga sin fundament da las prestaziuns che resultan durant in onn da scola. La promoziun en la proxima classa basegna ina media da tut las notas ch'è suffizienta, e per regla notas suffizientas en ils roms centrals.

Sch'in attestat è insuffizient, vegn fatga ina promoziun provisorica. Sch'il proxim attestat è puspè insuffizient, na vegn fatga nagina promoziun en la proxima classa. La scolara u il scolar po repeter il stgalim da l'annada ch'è vegnì frequentà sco ultim u cuntinuar en in nivel pli bass, eventualmain èsi er necessari d'assegnar ad ella u ad el mesiras da promoziun da pedagogia speziala. Scolaras e scolars che frequentan il nivel da las exigenzas il pli bass pon repeter il stgalim da l'annada ch'è vegnì frequentà sco ultim en in nivel da las exigenzas superiur, per meglierar uschia lur schanzas da furmaziun.

Examens finals

I na dat nagin examen final naziunal da la scola obligatorica e pia er nagin attestat final respectiv. Paucs chantuns realiseschan a la fin dal stgalim secundar I in examen final en ils roms principals saja quai en singuls ubain en tut ils nivels da pretensiun.