Scolas autas da pedagogia (SAP)
L'onn 1995 èsi vegnì decidì da scolar las persunas d'instrucziun al stgalim terziar. Quai è stà il punct da partenza d'ina refurma che tegna quint er en la scolaziun da las novas pretensiuns visavi la professiun da magister. La refurma ha gì duas finamiras principalas: ina professiunalisaziun pli intensiva da las persunas d'instrucziun sco er la renconuschientscha naziunala dals diploms da chantunals da magistra u da magister.
La scolaziun da persunas d'instrucziun per la scola preliminara, per il stgalim primar, per il stgalim secundar I e per las scolas da maturitad gimnasiala sco er per las professiuns en il sectur da la pedagogia speziala (educaziun prescolara pedagogic-curativa, pedagogia curativa da scola, logopedia e terapia da psicomotorica) ha lieu per gronda part a las scolas autas da pedagogia (SAP), per ina pitschna part a las scolas autas universitaras (SAU), a las scolas autas professiunalas da musica e da furmaziun creativa (SAPr).
La scolaziun da persunas ch'èn responsablas per la furmaziun professiunala en ils manaschis d'emprendissadi sco er da las persunas d'instrucziun a las scolas professiunalas spezialisadas ed a las scolas professiunalas superiuras vegn reglada en il rom da la furmaziun professiunala.
Incumbensas centralas
Las scolas autas da pedagogia (SAP), las qualas appartegnan tipologicamain a las scolas autas professiunalas (SAPr), ma cun in'auter gener da direcziun, han la suandanta incarica da prestaziun:
-
instrucziun: scolaziun e furmaziun supplementara han ina basa scientifica e sa refereschan a la professiun ed a la pratica.
-
perscrutaziun e svilup
-
servetschs vegnan furnids.
Direcziun e cundiziuns generalas
Las quattordesch scolas autas da pedagogia (SAP) appartegnan tipologicamain a las scolas autas professiunalas (SAPr) pertutgan dentant il champ da cumpetenza dals chantuns ed èn suttamessas a regulaziuns chantunalas ed interchantunalas. Las instituziuns ch'èn responsablas per las scolas autas da pedagogia èn in u plirs chantuns. Ina scola auta da pedagogia po sa chattar en plirs lieus.
La furmaziun da las persunas d'instrucziun vegn dirigida en emprima lingia dals relaschs da la CDEP concernent la renconuschientscha da diploms. Quests relaschs reglan la renconuschientscha naziunala dals diploms e la controlla da la qualitad da la scolaziun e dals diploms. Ils reglaments davart la renconuschientscha cuntegnan pretensiuns minimalas concernent las finamiras ed ils cuntegns da la scolaziun, concernent la dimensiun dal studi, concernent las premissas d'admissiun sco er concernent la qualificaziun da las docentas e dals docents. La conferenza svizra da las directuras e dals directurs chantunals da l'educaziun publica (CDEP) renconuscha mo studis che correspundan a las premissas dals reglaments davart la renconuschientscha. Ils chantuns s'obligheschan da pussibilitar a tut las titularas ed a tut ils titulars d'in diplom renconuschì il medem access al martgà da plazzas da lavur. En il rom da la refurma da la scola auta duain en il futur las scolas autas da pedagogia (SAP) vegnir accreditadas instituziunalmain tuttina sco las ulteriuras scolas autas; la renconuschientscha dals diploms tras la CDEP duai vegnir cuntinuada.
Il cussegl da las scolas autas professiunalas svizras (CSAPrS) è l'organ politic-strategic ch'è cumpetent per la collavuraziun interchantunala en tut las dumondas da las scolas autas ed è a medem temp l'organ directiv da las scolas autas da pedagogia (SAP). La coordinaziun professiunala da las instituziuns da furmaziun per persunas d'instrucziun è chaussa da la conferenza svizra da las recturas e dals recturs da las scolas autas da pedagogia (COHEP), e quai per incarica da la CDEP. La COHEP è la reuniun da tut las recturas e da tut ils recturs da las scolas autas da pedagogia e d'autras instituziuns da furmaziun per persunas d'instrucziun.
Basa giuridica
-
Ils chantuns da staziunament resp. ils chantuns responsabels reglan lur scolas autas da pedagogia (SAP) en leschas e disposiziuns chantunalas correspundentas.
-
La cunvegna interchantunala davart las scolas autas professiunalas (CSAP) da 2003 vala a partir da l'onn 2005 er per las scolas autas da pedagogia (SAP). Ella regla l'access interchantunal a las scolas autas da pedagogia sco er las indemnisaziuns ch'ils chantuns da domicil da las studentas e dals students pajan a las instituziuns ch'èn responsablas per las scolas autas da pedagogia.
-
Sa basond sin la cunvegna interchantunala davart la renconuschientscha da certificats da scolaziun da 1993 ha la conferenza svizra da las directuras e dals directurs chantunals da l'educaziun publica (CDEP) relaschà differents reglaments davart la renconuschientscha per ils diploms da persuna d'instrucziun:
reglament dals 10 da zercladur 1999 per renconuscher ils diploms da las scolas autas per persunas d'instrucziun dal stgalim prescolar e primar;
reglament dals 26 d'avust 1999 per renconuscher ils diploms da scola auta per persunas d'instrucziun dal stgalim secundar I;
reglament dals 4 da zercladur 1998 per renconuscher ils diploms da persuna d'instrucziun per scolas da maturitad;
reglament dals 12 da zercladur 2008 per renconuscher ils diploms sin il champ da la pedagogia speziala (direcziun d'approfundaziun "educaziun prescolara pedagogic-curativa" e direcziun d'approfundaziun "pedagogia curativa da scola");
reglament per renconuscher ils diploms da scola auta en logopedia ed ils diploms da scola auta en terapia da psicomotorica dals 3 da november 2000.
-
Reglament davart la denominaziun dals diploms sco er dals masters da furmaziun supplementara sin il champ da la furmaziun da persunas d'instrucziun en il rom da la refurma da Bologna (reglament da titels).
Scolaziuns da basa
Las scolas autas da pedagogia (SAP) porschan differents diploms ch'èn orientads a tscherts stgalims da scola specifics sco er diploms en il sectur da la pedagogia speziala. I dat las suandantas scolaziuns:
-
persuna d'instrucziun per il stgalim preliminar e/u per il stgalim primar (studi da bachelor); tut tenor l'instituziun datti scolaziuns per il stgalim preliminar, per il stgalim primar (per in tschert stgalim u per tut ils onns da scola primara); u studis cumbinads per il stgalim preliminar e per il stgalim primar
-
persunas d'instrucziun per il stgalim secundar I (studi da master)
-
persuna d'instrucziun per scolas da maturitad (scolaziun da pedagogia-didactica durant u suenter in studi scientific da bachelor-master)
-
scolaziuns en il sectur da la pedagogia speziala: direcziuns d'approfundaziun "educaziun prescolara pedagogic-curativa" e "pedagogia curativa da scola" (studi da master)
-
logopedia e terapia da psicomotorica (studi da bachelor).
Persunas responsablas per la furmaziun professiunala
Las persunas ch'èn responsablas per la furmaziun professiunala sco er las persunas d'instrucziun che instrueschan en la furmaziun fundamentala professiunala, en la furmaziun professiunala superiura ed en la furmaziun supplementara orientada a la professiun, èn per regla persunas da professiun che possedan ina furmaziun supplementara pedagogica e metodic-didactica. L'instrucziun ch'ellas dattan vegn reglada da la lescha federala davart la furmaziun professiunala sco er dals plans d'instrucziun generals per persunas responsablas per la furmaziun professiunala che vegnan relaschads da l'uffizi federal da furmaziun professiunala e da tecnologia (UFFT). Las scolaziuns pon vegnir absolvidas a l'institut federal da scola auta per la furmaziun professiunala (IFFP) u ad auters instituts da furmaziun publics (tranter auter scolas autas universitaras [SAU]; scolas autas da pedagogia [SAP]) u privats. Las scolaziuns ston vegnir renconuschidas da l'uffizi federal da furmaziun professiunala e da tecnologia (UFFT) e per part dal chantun. Ultra dals certificats federals e dals diploms pon ins er obtegnair in Master of Science en furmaziun professiunala.
Instituziuns dal sectur da las scolas autas da pedagogia
Scolas autas da pedagogia / instituziuns per la furmaziun da persunas d'instrucziun
