bildungsszene.educa.ch

egl da colur cun background grisch cun lingeras

Dapi l'onn 1997 posseda il mund da las scolas autas da la Svizra ultra da las scolas autas universitaras (SAU) in segund tip da scola auta, las scolas autas professiunalas (SAPr) ch'èn resultadas cun concentrar e cun metter prioritads en var 60 scolas autas professiunalas superiuras (SPS). Las scolas autas professiunalas porschan studis da scola auta orientads a la pratica ed a l'applicaziun cun diploms dal stgalim da bachelor che cuntegnan qualificaziuns professiunalas. Dapi l'onn 2008 intermedieschan ellas sin il stgalim da master supplementarmain enconuschientschas pli profundas, spezialisadas e che sa basan sin la perscrutaziun e preparan las studentas ed ils students per in diplom supplementar che cuntegna qualificaziuns professiunalas.

En total datti set scolas autas professiunalas regiunalas da dretg public e duas scolas autas professiunalas renconuschidas da dretg privat:

Scola auta professiunala bernaisa (SAPr-BE)
Scola auta professiunala da la Svizra dal nordvest (SAPr-NV)
Scola auta professiunala da la Svizra orientala (SAPSO)
Haute école spécialisée de la Suisse occidentale (HES-SO)
Scola auta da Lucerna
Scuola universitaria professionale della Svizzera italiana (SUPSI)
Scola auta professiunala turitgaisa (SAPr-ZH)
la "Fernfachhochschule Schweiz (FFHS)" porscha studis a distanza en ils secturs da l'economia, da l'informatica e da l'inschigneria ed è ina scola parziala da la SUPSI ch'è renconuschida sin plaun federal
Scola auta professiunala Kalaidos
Haute école spécialisée Les Roches-Gruyère.

Il tip da scola auta "scola auta professiunala (SAPr)" cuntegna er las scolas autas da pedagogia (SAP).

Incumbensas centralas

L'incarica da prestaziun da las scolas autas professiunalas (SAPr) cumpiglia la teoria (scolaziun e furmaziun supplementara), la perscrutaziun ed il svilup orientads a l'applicaziun, il servetsch a favur da terzas persunas sco er la collavuraziun cun las scolas autas e cun ils instituts da perscrutaziun en Svizra ed a l'exteriur.

Direcziun e cundiziuns generalas

Las scolas autas professiunalas (SAPr) vegnan regladas tras la lescha federala davart las scolas autas professiunalas. Cun excepziun da las duas scolas autas professiunalas privatas èn ils chantuns las instituziuns ch'èn responsablas per ellas. L'approvaziun da manar ina scola auta professiunala vegn dada dal cussegl federal. En il departament federal d'economia (DFE) è cumpetent l'uffizi federal da furmaziun professiunala e da tecnologia (UFFT) per las scolas autas professiunalas. La cumissiun federala per las scolas autas professiunalas (CFSAP) cusseglia il cussegl federal ed il DFE en dumondas che concernan la politica da las scolas autas.
Il cussegl da las scolas autas professiunalas svizras (CSAPrS) da la conferenza svizra da las directuras e dals directurs chantunals da l'educaziun publica (CDEP) è l'organ politic-strategic per la collavuraziun interchantunala en tut las dumondas che concernan las scolas autas professiunalas. El coordinescha la planisaziun dal svilup sin plaun naziunal e collavura cun la confederaziun. Dal CSAPS fan part las directuras ed ils directurs d'educaziun da quellas regiuns resp. da quels chantuns ch'èn cumpetents per las scolas autas professiunalas.
La conferenza svizra da las scolas autas professiunalas (CSSAPr) e la reuniun da las direcziuns da las scolas autas professiunalas svizras (SAP). Ella represchenta ils interess da las scolas autas professiunalas visavi la confederaziun e visavi ils chantuns sco er visavi autras instituziuns da furmaziun e da perscrutaziun. Ella è la partenaria dal cussegl da las scolas autas professiunalas svizras (CSAPS) e tgira stretgs contacts cun l'uffizi federal da furmaziun professiunala e da tecnologia (UFFT).
Scolas autas professiunalas ston laschar accreditar ellas sezzas e lur scolaziuns. Per l'accreditaziun è cumpetent il departament federal d'economia (DFE). L'accreditaziun po er vegnir delegada ad agenturas d'accreditaziun renconuschidas.

Basa giuridica

I vala la suandanta basa giuridica per las scolas autas professiunalas (SAPr):

lescha federala dals 6 d'october 1995 davart las scolas autas professiunalas (LSAPr)
ordinaziun dals 11 da settember 1996 davart l'installaziun e la gestiun da scolas autas professiunalas
ordinaziun dal DFE dals 2 da settember 2005 davart l'admissiun a studis da scola auta professiunala
ordinaziun dal DFE dals 2 da settember 2005 davart las scolaziuns, ils diploms supplementars ed ils titels a las scolas autas professiunalas
sco er ulteriuras reglamentaziuns davart secturs specifics (tranter auter accreditaziun, concepziun da studis da master e.u.v.)
sin plaun interchantunal vala la cunvegna interchantunala dals 12 da zercladur 2003 davart las scolas autas professiunalas (CSAP) a partir da l'onn 2005; ella regla l'access interchantunal a las scolas autas professiunalas (SAPr) e l'indemnisaziun ch'ils chantuns da domicil da las studentas e dals students pajan a las instituziuns ch'èn responsablas per las scolas autas professiunalas
sin basa da la lescha federala davart las scolas autas professiunalas (LSAPr) han ils chantuns elavurà leschas chantunalas davart las scolas autas professiunalas che reglan la concepziun e la gestiun da las scolas autas professiunalas.

Pervia dal nov artitgel da la constituziun federala davart las scolas autas (CF art. 63a) duain las scolas autas professiunalas (SAPr) vegnir manadas sin il plaun svizzer tuttina sco las scolas autas universitaras. La lescha federala davart l'agid a las scolas autas e davart la coordinaziun en il sectur da las scolas autas svizras (LASA) vegn a chaschunar ina midada da sistem per las scolas autas professiunalas. L'actuala lescha federala davart las scolas autas professiunalas (LASAPr) vegn a vegnir abolida cun l'entrada en vigur da la nova lescha federala davart l'agid a las scolas autas e davart la coordinaziun en il sectur da las scolas autas svizras (LASA).