Scolas da maturitad gimnasiala (gimnasis)

Scolas da maturitad gimnasiala datti en tut ils chantuns. L'onn 1995 è vegnida fatga ina revisiun totala da la scolaziun da maturitad. Dapi alura reglan la confederaziun ed ils chantuns communablamain la renconuschientscha naziunala dals certificats da scolaziun da las scolas da maturitad gimnasiala. La basa per questa regulaziun è l'ordinaziun dal cussegl federal resp. il reglament da la conferenza svizra da las directuras e dals directurs chantunals da l'educaziun publica (CDEP) per la renconuschientscha dals attestats da maturitad gimnasiala [RRM] da l'onn 1995. Per gronda part mainan ils chantuns las scolas da maturitad gimnasiala. Questas scolas ston vegnir renconuschidas da la confederaziun e da la conferenza svizra da las directuras e dals directurs chantunals da l'educaziun publica (CDEP).

La structura e la durada da l'entira scolaziun fin a la maturitad varieschan tut tenor chantun. La scolaziun che tanscha dal stgalim primar fin a la maturitad gimnasiala dura tut en tut almain 12 onns. L'entrada en ina scola da maturitad gimnasiala ha lieu il 9avel (il pli savens) u il 10avel onn da scola (14avel u 15avel onn da vegliadetgna) e dura per gronda part quatter onns (gimnasi da curta durada). En cas d'ina scolaziun da maturitad da trais onns (entrada il 10avel onn da scola) sto avair lieu il 9avel onn da scola ina prescolaziun gimnasiala en in tip da scola cun pretensiuns superiuras. Differents chantuns mainan er scolas da maturitad gimnasiala, las qualas cumenzan gia suenter il stgalim primar, il 7avel onn da scola (gimnasi da lunga durada; durada: sis onns). La maioritad da las scolaras e dals scolars frequenta ina scola publica da maturitad gimnasiala.

Scolas da maturitad gimnasiala

Las scolas da maturitad gimnasiala preparan per cumenzar scolaziuns da cuntinuaziun sin il stgalim terziar, particularmain per il studi ad ina scola auta universitara (SAU). Ellas na qualifitgeschan betg per ina professiun. Cun 19 onns en media survegnan las scolaras ed ils scolars in certificat da maturitad, suenter ch'ellas e ch'els han fatg cun success l'examen da maturitad. Quest certificat da maturitad vala sco la premissa per l'admissiun ad ina universitad chantunala, scola politecnica federala (SPF), scola auta da pedagogia (SAP).

Diplom da maturitad gimnasiala suenter

Las persunas che vulan prender suenter il diplom da maturitad gimnasiala, pon frequentar ina scola renconuschida da maturitad gimnasiala per persunas creschidas (durada: almain trais onns) u pon far ils examens svizzers da maturitad. Ils examens svizzers da maturitad vegnan organisads sut la responsabladad da la cumissiun svizra da maturitad (CSM). I stat liber co ch'ins vul sa preparar per l'examen; quai po vegnir fatg en ina scola privata da maturitad u en moda autodidactica.