Scolas medias professiunalas (SMP)

Las scolas medias professiunalas (SMP) èn, ultra da las scolas da maturitad gimnasiala, las scolas da furmaziun generala dal stgalim secundar II. Sin fundament da las refurmas e dals svilups en il sectur da la scolaziun da maturitad gimnasiala e da la furmaziun professiunala èn las scolas medias professiunalas resultadas da las scolas medias da diplom e las han substituì successivamain a partir dal 2004.

Las scolas medias professiunalas preparan per ina scolaziun professiunala a las scolas professiunalas superiuras (SPS) particularmain en ils secturs da la sanadad e da la lavur sociala, da la pedagogia e da l'art applitgà/art. L'entrada en la scola media professiunala ha lieu suenter la scola obligatorica (15avel onn da vegliadetgna). La scolaziun fin a l'emprim certificat (certificat da scola media professiunala) dura trais onns. Suenter il certificat da scola media professiunala po vegnir fatga la maturitad spezialisada, e quai suenter ina scolaziun supplementara da maximalmain in onn. Persunas creschidas pon absolver ina scolaziun da maturitad ad ina scola media professiunala u ad ina scola da maturitad professiunala en ina scola da creschids a temp cumplain u a temp parzial.

Lescha

Las scolas medias professiunalas (SMP) ston esser renconuschidas da la conferenza svizra da las directuras e dals directurs chantunals da l'educaziun publica (CDEP). La basa per quai èn il reglament davart la renconuschientscha dals diploms da las scolas medias professiunalas sco er differentas directivas. Sco basa per ils plans d'instrucziun vala il plan d'instrucziun general per scolas medias professiunalas.

23 chantuns han introducì las scolas medias professiunalas (SMP); tut ils chantuns che avevan fin ussa scolas medias da diplom (SMD), ed intginas paucas purschidras privatas u intgins paucs purschiders privats, han ussa scolas medias professiunalas. La scolaziun da maturitad professiunala na po betg vegnir absolvida en mintga chantun. Differents chantuns han cumenzà cun la procedura da renconuschientscha per la scolaziun da maturitad professiunala.