Scolaziun cuntinuanta

Durant il stgalim secundar I frequentan las scolaras ed ils scolars lecziuns da tscherna da professiun. En questas lecziuns vegnan ellas ed els intimads da ponderar davart lur vita futura, d'analisar lur abilitads e lur giavischs professiunals ed eventualmain da consultar posts d'infurmaziun (tranter auter posts d'infurmaziun e da cussegliaziun professiunala). Mintga chantun ha posts d'infurmaziun e da cussegliaziun professiunala che stattan a disposiziun gratuitamain a tut las scolaras ed a tut ils scolars.

Stgalim secundar II

Il nivel da las exigenzas il pli bass dal stgalim secundar I prepara per ina furmaziun fundamentala professiunala da dus onns u per ina tala da trais u da quatter onns. Il nivel da las exigenzas superiur dal stgalim secundar I prepara per ina furmaziun fundamentala professiunala da trais u da quatter onns (er cun maturitad professiunala) sco er per scolas da furmaziun generala dal stgalim secundar II (scolas da maturitad gimnasiala, scolas medias professiunalas [SMPr]).

Purschidas transitoricas

Per giuvenils che na cumenzan betg – suenter ch'els han terminà il stgalim secundar I – directamain ina furmaziun fundamentala professiunala u ina scola da cuntinuaziun dal stgalim secundar II, stattan a disposiziun purschidas transitoricas.