Svilup

Tras la revisiun da las disposiziuns concernent la furmaziun en la constituziun federala (CF) èn ils chantuns obligads da coordinar e da reglar tscherts parameters. Sche las stentas da coordinaziun fan naufragi, survegn la confederaziun ina cumpetenza subsidiara da decider en tscherts secturs.

La cunvegna interchantunala davart l'armonisaziun da la scola obligatorica (concordat HarmoS) duai reglar tals parameters (la vegliadetgna d'ir a scola, l'obligaziun d'ir a scola, la durada e las finamiras dals stgalims da furmaziun, las midadas d'in stgalim a l'auter sco er la renconuschientscha da diploms) per la scola obligatorica. Il concordat HarmoS è vegnì deliberà l'onn 2007 da la conferenza svizra da las directuras e dals directurs chantunals da l'educaziun publica (CDEP). Ils process da ratificaziun en ils chantuns èn en curs. La cunvegna entra en vigur, cur che 10 chantuns èn sa participads ad ella. Suenter han ils chantuns sis onns temp per adattar lur structuras (il concordat HarmoS entra en vigur probablamain l'onn 2009, ils chantuns ch'èn sa participads ston pia avair fatg las midadas fin il pli tard l'onn da scola 2015/2016). Il concordat HarmoS vegn a chaschunar in'armonisaziun da las finamiras e da las structuras da la scola obligatorica per ils chantuns ch'èn sa participads.

Tenor il nov artitgel da la constituziun federala (CF, art. 63a) davart las scolas autas procuran la confederaziun ed ils chantuns communablamain per la coordinaziun e per la garanzia da la qualitad en ils fatgs da las scolas autas da la Svizra. Sco basa giuridica unitara per reordinar il sectur da las scolas autas da la Svizra resulta la nova lescha federala davart l'agid a las scolas autas e davart la coordinaziun en il sectur da las scolas autas svizras (LASA).

Tras la NGF èn la scolaziun speziala e las mesiras da pedagogia speziala passadas l'onn 2008 en la responsabladad dals chantuns. La confederaziun è sa retratga da la finanziaziun sur l'assicuranza d'invaliditad (AI) sco er da la regulaziun ch'è colliada cun quai. Durant in termin transitoric da trais onns sto vegnir garantida la purschida che vegniva messa a disposiziun fin ussa da l'assicuranza d'invaliditad (AI). Il pli tard a partir da l'onn 2011 vegnan fatgs valair ils concepts chantunals davart la scola speziala che vegnan elavurads dals chantuns. Per la collavuraziun chantunala è vegnida creada la cunvegna interchantunala davart la collavuraziun en il sectur da la pedagogia speziala (concordat da la pedagogia speziala). Quest concordat entra en vigur, sche almain 10 chantuns èn sa participads, il pli baud dentant il 1. da schaner 2011.

Ils stipendis èn da princip chaussa dals chantuns, la confederaziun sa participescha cun subvenziuns. Il dretg da survegnir stipendis (stipendis, emprests) e la calculaziun da quels vegn fatga a basa da las legislaziuns chantunalas da stipendis. Pervia da la NGF surpiglian ils chantuns dapi l'onn 2008 la cumplaina responsabladad e finanziaziun dals stipendis fin e cun ils staglim secundar II – la confederaziun sustegna mo pli las contribuziuns da scolaziun sin il stgalim terziar. Cun la finamira da gidar ad armonisar las 26 legislaziuns chantunalas da stipendis ha la conferenza svizra da las directuras e dals directurs chantunals da l'educaziun publica (CDEP) elavurà ina cunvegna interchantunala per armonisar las contribuziuns da scolaziun (concordat da stipendis).

Suenter l'introducziun da la nova lescha federala davart la furmaziun professiunala (en vigur dapi il 1. da schaner 2004) vegnan ussa fatgas las lavurs da realisaziun en ils chantuns.

La confederaziun ed ils chantuns han etablì in monitoring da furmaziun per metter a disposiziun la basa per reglar il sistem svizzer da furmaziun.