Svilup

Scola preliminara obligatorica

Tras la cunvegna interchantunala davart l'armonisaziun da la scola obligatorica (concordat HarmoS) daventa la scola preliminara (durada: dus onns) obligatorica per ils chantuns che vegnan a participar al concordat HarmoS, e quinta alura tar la scola obligatorica. La vegliadetgna d'entrada vegn fixada sin il quart onn da vegliadetgna cumplenì (di da referenza: 31 da fanadur). En cas individuals poi – sin dumonda dals geniturs – er esser pussaivel d'entrar pli tard. Quai correspunda a la tendenza dals chantuns da far daventar obligatoric il sectur da la scola preliminara ch'è fin ussa anc facultativ.

Stgalim da basa (“Grundstufe” e “Basisstufe”)

Ina vasta discussiun ha lieu davart la flexibilisaziun da la midada da la scola preliminara a davart la scola primara e la nova concepziun tematica ed organisatorica dal stgalim da scola inizial: en experiments da scola pertutgant il stgalim da basa vegnan uffants da quatter fin otg onns instruids communablamain. Ils onns da scola preliminara vegnan unids cun ils emprims onns dal stgalim primar (cf. scola obligatorica: stgalim da basa).

Uras da bloc e structuras dal di

La maioritad dals chantuns ha scolas cun uras da bloc cumplessivas (instrucziun d'almain a trais uras e mez durant tschintg avantmezdis per emna u durant quatter lecziuns). Las uras da bloc valan dentant mo en ina minoritad dals chantuns per tut lur scolas.

La part da scolas preliminaras cun ina maisa da mezdi assistida è sut 25%, scolas dal di per uffants da la vegliadetgna prescolara datti mo paucas. Il chantun Tessin è ina excepziun: el ha ina purschida considerabla da scolas dal di e da scolas cun ina maisa da mezdi.

Plans d'instrucziun

Las furmas d'instruir e d'emprender e quellas dals emprims onns da scola èn s'avischinadas. A partir da la fin dals onns 1990 han numerus chantuns introducì novs plans d'instrucziun per la scola preliminara che cuntegnan finamiras d'instrucziun liantas. Las finamiras d'instrucziun per la scola preliminara vegnan integradas en ils plans d'instrucziun da las regiuns linguisticas. Quests plans vegnan sviluppads en il rom da l'armonisaziun da la scola obligatorica (HarmoS).