Svilup

stanza da scola cun strada

Tant sin plaun naziunal sco er sin plaun chantunal sto la scola obligatorica far frunt a refurmas ed a sfidas che han consequenzas er per il stgalim primar. Quai èn tranter auter:

  • la cunvegna interchantunala davart l'armonisaziun da la scola obligatorica (concordat HarmoS) vegn a chaschunar in'armonisaziun da las finamiras e da las structuras da la scola obligatorica per ils chantuns ch'èn participads: prolungaziun da la scola obligatorica (scola preliminara obligatorica, vegliadetgna d'entrada unitara per la scola preliminara cun il quart onn da vegliadetgna cumplenì, flexibilisaziun da la scolarisaziun), unificaziun da las structuras chantunalas da scola, introducziun da standards da furmaziun liants per l'entira Svizra, instrucziun da duas linguas estras gia a partir dal stgalim primar, plans e meds d'instrucziun tenor las regiuns linguisticas, instrucziun en uras da bloc, promoziun da structuras dal di confurmas al basegn;

  • l'introducziun dad uras da bloc e da structuras dal di: la part da las scolas cun uras da bloc generalas (cumpareglià cun tut las scolas dal stgalim primar) è en circa la mesadad dals chantuns sur 50%. La part da las scolas cun ina maisa da mezdi assistida è per il pli sut 50%. La purschida da scolas dal di sa restrenscha ad in pèr paucas per chantun (cun excepziun dal chantun Tessin che ha ina purschida considerabla da scolas dal di e da scolas cun ina maisa da mezdi);

  • flexibilisaziun dal stgalim inizial

    (cf. scola obligatorica);

  • in'eterogenitad augmentanta da las classas da scola (cf. scola obligatorica);

  • tenor la lescha federala davart l'eliminaziun dals dischavantatgs envers ils impedids ed en il senn da la cunvegna interchantunala davart la collavuraziun en il sectur da la pedagogia speziala (concordat da la pedagogia speziala) ston ils uffants cun basegns spezials vegnir integrads en la scola regulara. En ils chantuns ed en las vischnancas èn en curs projects per l'integraziun da scolaras e da scolars cun basegns spezials. Da l'autra vart èn la quota dals uffants en classas ed en scolas spezialas ed er il basegn da purschidas spezialas s'augmentads permanentamain dapi l'onn 1980.

    L'onn 2008 han ils chantuns surpiglià la responsabladad per il sectur da la pedagogia speziala per uffants e per giuvenils. Quai ha per consequenza ch'i dat midadas en la scola obligatorica e quai pretenda ina coordinaziun tranter ils chantuns (cf. pedagogia curativa e speziala);

  • las scolas survegnan ina libertad d'agir pli e pli vasta e sa participeschan al svilup ed a la garanzia da la qualitad.